تاج جالى من الاخ حسن حنفى مشكووور يا افندم
اعتذر عن التأخر فى الرد
------------------------
وندخل على اول سؤال
بدأت تدون من امتي ؟ و دخلت العالم ده ازاي ؟
بدأت من سنة وكام شهر بس ما بداتش اهتم بيه واحس انى عايزة اقول كلام غير من كام شهر, دخلته ازاى بقا ده كان واحد زميلى فى الكلية باعت ع الميل جروب بتاعنا اخر بوست كتبه , شدتنى الفكرة انى اكتب واقول رايى واتناقش مع ناس .. وبدأت
ايه كان انطباعك في البداية ؟
خوف , انى ماقدرش اسيب اثر او تكون لى بصمة عند اى حد
مين اكتر واحد بتهتم بتعليقه علي بوستك الجديد ؟
بهتم بأى حد يقرالى ويناقشنى وبقراله كمان عشان اعرف مخه ايه
ايه أهم حاجة اتعلمتها من عالم التدوين ؟
اتعلمت ازاى اقول رأيى واطلع كلام جوايا
واتعملت ازاى نقدى يبقى فى الجون بس من غير جرح
وانى ماتكسفش الفت نظر حد لحاجة مش عجبانى ممكن كمان هوا مش واخد باله
بقا فى حرية وصراحة وجرأة أكترفى كلامى
ايه أكتر حاجة كرهتها ؟
كرهت ان فى ناس بتشنع بناس وتقول كلام مايصحش يتقال , مثلا واحد عامل مدونة اسلامية تلاقى واحد بيهاجمه ويقوله انت ماضيك كذا وحياتك كذا و و و .. كنت اتمنى ان المهاجم ده يلاقى مثلا فقرة او نص مش صحيح وينقده او يلفت نظره ليه , انا ليا ان المدون كلامه كويس ومحترم وخلاص مش حياته وماضيه
حاسة ان التدوين له تأثير ؟
اه ليه تاثير على المدونين وربطهم مع بعض بعلاقة جميلة من مجرد كلماتهم وانفعالتهم , وكمان فى اصحابى غير مدونين وبيتابعونى وبيعلقو ع الميل او كلام وش كده , بفرح جدا بمتابعتهم ورأيهم وهما بره التدوين بس فى اثر للتدوين عندهم ولا ما كانو تابعوا ولا شجعونى
تهدى التاج لمين ؟
عم احمد , long distans , Good man ,
واحد من الناس , سكر , محمد هشام
وشكرا لصبركم عليا , بقيت رغاية اوى
...
وفاء
